NUKUWA'IPA WANEE WAYUU SÜNAIN ARÜLEEJAA
Atamaashi wayuu arüleejüi sünain eirakawaa sümüin sutu'u ai süchiirua nürüleejüin eekai nnojoluin wane ka'i paala. Mekeetshi süchiirua, asakitshi sulu'u wane miichi, tü pei'paakala amaa nürüleejüin, nünta anainrüjaa sükajee tia, Je nüchoiin naya aliichajaaka süchira tü nürüleejüinkalü, süpüla yajaaushin je süpüla keesüin.
Nüjünain shia watta'a maalü sünain ekajawaa je süpüla asaa wuin sulu'u laa, moliinalu'u shiale. Maaka kaleo'u nuutkale'erüin miichipa'a. Antüshii nia motsopa ka'i süchikijee ouyantaa, je nikerojirüin shia sulu'u sukulaatse süpüla shiyaawajünüin. Nükatajüin tü süchooincheinkalü aipa'a süpüla süliichajünüin tü shiikalü wattachon. Niiyajüin shia müleka ayuuire, ayalajüshi wunu'u shipinase. Je jemeiwakalü ou shia eesü müleka jemeire wuna'apü. Nüchajaa achikülü suulia shikajüin wuchii tü süchooincheinkalü. Eesü müleka amülouire shia sutuma mainmajuuin. Mojulaasü walirü sümüin, shiküin tü süchooin eekai motsoyunnuuin. Nüchajaa achikülü tü walitkalü süpüla nu'utuin saa'in. Eesü wane wuchii mashale'e sünülia, ekülü mürülü jouucheein; nüchajaa achikülü süpüla nu'utuin saa'in.
Müleka wainmale süchooin, nürüleejüin. Ka'apunnuupa shia, nüsiimaraalajüin süche'e kaaula, anneerü, pa'aa, je nüsijaain süka jeerü kachuweera. Anewiijünüsü eekai tooloyuuin süpüla oikünaa. Süpüshuwa'a tia kekiirasü wainma asalaa nutuma, eesü ekawaa, eesü asawaa uujolu je yootshi. Chi arüleejüikai ni'raajüin nürüleejüin, ni'raajüin süta, sünou, shi'ira, je su'uichiki. Wane arüleejüi müliashi jamü, minyaasü, je mapüsashi. O'onooshi sümaa aipa jamü, nüchajaain eere eein juya, eere eein wuin, eere eein wüitüshii.
Müsülee sukuwa'ipa tü arüleejaakalü sulu'u tü woumainkalü Wajiira. Je tü mürülü arüleejünakalü shia anneerü, kaaula, pa'aa, püülükü, püliikü je müsia ama. Müsülee nukuwa'ipa wayuu sünain ainmajaa nümünüin.
